سان فرانسسکو (عارف الحق عارف، نمائندہ خصوصی)
نہتے اور مظلوم فلسطینی عوام کیساتھ یکجہتی کے عالمی دن کے موقع پر ہفتہ 5نومبر کو کیلیفورنیا کے شہر سان فرانسسکو میں غزہ میں ان عوام کے مسلسل قتل عام کیخلاف اس شہر کی تاریخ کی سب سے بڑی ریلی نکالی گئی جس میں ہزاروں افراد نے حصہ لیا۔ یہ ریلی ایک بجے سے پانچ بجے تک جاری رہی۔ اس تاریخی ریلی میں تین ہفتوں سے زائد جاری فلسطینی عوام کے قتل عام اور ان کی کی نسل کشی کو فوری طور پر بند کرنے کا مطابہ کیا گیا۔ اس بڑے احتجاجی مظاہرے میں بلا امتیاز مذہب، رنگ، نسل اور زبان اور جنس معصوم بچوں،جوان مردوں اور عورتوں اور ضعیف بزرگوں اور معذوروں تک نے حصہ لیا جو اسی شہر کے باشندوں کے علاوہ شہر کے چاروں طرف بے ایریا کے علاقائی شہروں اور بستیوں سے ڈرائیو کرکے اپنے خاندانوں کیساتھ شریک ہوئے تھے۔ اس احتجاجی مظاہرے میں مسلمانوں سے زیادہ عیسائی اور دوسرے مذاہب کے لوگ نظر آرہے تھے۔ اس بڑی ریلی کا انتظام فلسطینیوں، مسلمانوں اور دوسرے مذاہب کی مختلف تنظیموں کے علاوہ حقوق انسانی کی انجمنوں نے مشترکہ طور پر کیا تھا۔ریلی کے شرکا نے ہزاروں کی تعداد میں فلسطین کے پرچم ، پلے کارڈز اور بینر اٹھا رکھے تھے جن پر غزہ میں فلسطینی عوام کا مسلسل قتل عام اور ان کی نسل کشی بند کرو،ہاسرائیل کو فوجی امداد بند کرو، ہمارے ٹیکسوں سے جمع رقم کو حملہ آوروں اور قاتلوں کو اربوں ڈالرز بھجنا بند کرو، فوری طور پر سیز فائر کرو،غزہ کے اسپتالوں اور انسانی آبادی پر بے رحمانہ بمباری بند کرو، فلسطین کو جابرانہ قبضہ سے آزاد کرو، اسرائیل کا بائیکاٹ کرو اور اس طرح کے اور نعرے لکھے تھے۔ مظاہرین نے مارچ کے سارے راستے فری فری فلسطین۔ فری فری غزہ۔ سٹاپ جینوسائیڈ ان غزہ۔ فرام دا ریور ٹو دی سی فلسطین ول بی فری کے نعرے لگائے۔
